க்ராஸ்-ஓவர் வெஜ். பஃப்ஸ்

தேவையான பொருட்கள்
பஃப் பேஸ்ட்ரி ஷீட்
வெஜிடபிள் ஸ்டஃபிங்-1கப்
முட்டை-1
மைதா(அ)ஆட்டா மாவு-1/4கப்

செய்முறை
பஃப் பேஸ்ட்ரி ஷீட்டை பேக்-இல் குறிப்பிட்ட நேரம் முன்பாக ஃப்ரீஸரில் இருந்து வெளியே எடுத்து வைக்கவும்.

ஸ்டஃபிங்-ஐ தயாரித்துக் கொள்ளவும்.

உலர்ந்த மாவு தூவி பேஸ்ட்ரி ஷீட்டை செவ்வகமாக தேய்க்கவும்.அதன் நடுவில் பூரிக்கட்டையை வைத்து இரண்டாக மடித்து,கத்தியால் பேஸ்ட்ரி ஷீட்டை படத்திலுள்ளவாறு நறுக்கவும்.

நறுக்கிய துண்டுகளை கவனமாக பிரித்து பூரிக்கட்டையை எடுத்துவிட்டு ஸ்டஃபிங்-ஐ வைக்கவும்.

ஒரு ஓரத்திலிருந்து ஒரு முனையை எடுத்து எதிர்புறமாக வைத்து அழுத்திவிடவும். பின்னர் அதற்கு எதிர்புறமிருக்கும் துண்டையும் அதே போல குறுக்காக வைத்து அழுத்திவிடவும்.

இதேபோல எல்லா துண்டுகளையும் ஒட்டவும்.

முட்டையுடன் சிறிது தண்ணீர் சேர்த்து கலந்துகொண்டு பேஸ்ட்ரிஷீட் மீது சீராக தடவி 5நிமிடங்கள் ஃப்ரீஸரில் வைக்கவும்.

400F ப்ரீஹீட் செய்த அவன்-ல் பேஸ்ட்ரி ஷீட்களை வைத்து 15நிமிடங்கள் பேக் செய்யவும்.

க்ராஸ்-ஓவர் பஃப்ஸ் ரெடி! கத்தியால் வேண்டிய அளவு துண்டுகளாக நறுக்கி பரிமாறவும்.

குறிப்பு
ஒரே ஷேப்பில் பஃப்ஸ் செய்வதற்கு பதிலாக இப்படி செய்தால் வித்யாசமாக இருக்கும். இதில் நான் ஸ்டஃப் செய்திருப்பது உருளை-கேரட்-பச்சை பட்டாணி சேர்த்த மசாலா. அவரவர் விருப்பப்படி முட்டை,மஷ்ரூம், நான்வெஜ் ஸ்டஃபிங், அல்லது பிடித்தமான பழங்கள்,ஜாம்,சாக்லேட் இனிப்புதேங்காய்த்துருவல் வைத்து பேக் செய்யலாம்.

இங்கு உபயோகித்திருக்கும் பேஸ்ட்ரிஷீட் சிறிய சதுரங்களாக இருப்பது. Pepperidge farm pastry sheet எனில் ஒரு ஷீட்டினை தேய்த்தாலே நல்ல நீளமாகும்.