மண்டே ப்ளூஸ்...[Monday blues...]

பொதுவா வீகெண்ட் 2 நாட்களும் ரிலாக்ஸ்டா இருக்கும்..திங்கட்கிழமை "மண்டே ப்ளூ'ஸ்"தான்!! மூணு நாட்களும் ஊர்சுத்தல்,இரவு முழுக்க டிவி பார்க்க என்று போயிடுமா..திங்கட்கிழம ஏண்டா வருதுன்னு இருக்கும். இந்த சலுப்பு எனக்கு ஒரு நாள் அட்வான்ஸ்டாவே வந்துடும்.ஞாயிறு காலை கண்ண முழிக்கும்போதே..அடடா..ஞாயித்துக்கிழமையாயிடுச்சே,நாளைக்கு இந்நேரம் பாதிவேலை ஆகிருக்கணுமே என்று பீலிங்(!!) ஆரம்பிச்சிடும்.

வாரத்துல எல்லா நாட்களுமே வெள்ளிக்கிழமையா இருந்தா( என்ன வெவரம் பாருங்களேன்,சனி,ஞாயிறு கூட இல்ல..வெள்ளிக்கிழமையாவே இருக்கணுமாம்.)எவ்வளவு நல்லா இருக்கும்? அடுத்து 2 நாள் ஆபீஸ் போகவேணாம்..8.20க்குள்ள லன்ச்பேக்,ப்ரேக்பாஸ்ட் ரெடியாகவேணாம்..நேரத்துக்கு சமைக்க வேணாம்(!??)..ரொம்ப நல்லா இருக்கும்ல??? ஹிஹிஹி! என்ன சொல்றீங்க லேடீஸ்? நான் சொல்றது கரெக்ட்தானே?
சமீபத்தில் ஒரு ஞாயிற்றுக் கிழமை, மஷ்ரூம் பிரியாணி செய்தேன்.என்னவருக்கு மிகவும் பிடித்துப்போய், திங்கட்கிழமைக்கும் லன்ச் பாக்ஸுக்கு இதே கொண்டு போறேன்-னு, அவரே லன்ச் பாக்ஸ்ல பேக் பண்ணி,பத்திரமா ப்ரிட்ஜ்ல எடுத்தும் வைச்சுட்டார்.காலைலயும் சீரியல் சாப்ப்டுக்கறேன்னும் சொல்லிட்டார்.நானும் ரிலாக்ஸ்டா மார்னிங் எழுந்து காபி குடிச்சிட்டு, லேப்டாப்ல உட்கார்ந்தேன். இவரும் ரெடியாகி ஆபீஸ் போனதும், சீரியலை சாப்ட்டுட்டு, இன்டர்நெட்டுல உலாவ(!!) ஆரம்பிச்சேன். 11.30 வாக்குல, ஒரு ப்ரெண்ட் ஆன்லைன்ல வரவும், அரட்டை ஆரம்பம்! அரைமணி நேரத்துக்கப்புறம் 'இன்னிக்கு என்ன சமையல்?'-னு கேட்டாங்க. அப்பதான் எனக்கு லன்ச்சுக்கு எதுவுமே பண்ணல என்பது நினைவு வந்தது.

அப்பவாவது கிடுகிடுன்னு கிச்சனுக்குப் போயி சமையலை ஆரம்பிச்சேனா? அதான் இல்ல..என்ன சமைக்கறதுன்னு ஒரு ஐடியாவும் வராததால,இந்த ஐடில இருந்து வெளியே போய் வேறொரு ஜிமெய்ல் ஐடில லாக்-இன் பண்ணேன்.அங்கே இன்னொரு ப்ரெண்ட் இருந்தாங்க. அவிங்க கூட அரட்டைய ஆரம்பிச்சேன். பசி வேற வயித்த கிள்ள ஆரம்பிச்சது. பேச்சுவாக்குல இப்புடி-இப்புடின்னு சொன்னனா..மைக்ரோவேவ்ல சமைச்சிருங்களேன்னாங்க. சரின்னு ஓடிப்போயி கொஞ்சம் ரைஸை தண்ணிக்குள்ள போட்டுட்டு வந்துட்டேன். சோறு ஓக்கே,அதுக்கு குழம்புவேணுமே?

அப்பதான் இந்த 'வெள்ளைக் கறி" ரெசிப்பிய சொன்னாங்க. அதைக்கொஞ்சம் என்னோட டேஸ்டுக்கு ஏத்த மாதிரி மாடிபிகேஷன் பண்ணி செய்தேன்.ஏனா அவங்க காரத்துக்கு பெப்பர் போட்டுப்பாங்களாம்.எனக்கு நாக்கு கொஞ்சம் நீளம்,மிளகு பொடி காரமெல்லாம், ஆம்லெட்டுக்கே பத்தாது.குழம்புன்னா மொளகாப்பொடி போடாம எப்படி? கூடவே கொஞ்சம் M.D.H. கறி பவுடரும் போட்டு காரசாரமா வெள்ளைக்கறி(சும்மா வெ.கறி,வெ.கறி-ன்னு சொல்லறீங்க,ஆனா மஞ்சளா இருக்கே?ன்னு எடக்கு-மடக்கா எல்லாம் யாரும் கேக்கக்கூடாது. கர்ர்ர்!)

ஊறிய அரிசிய, மைக்ரோவேவ்-ல 9 நிமிஷம் வைத்துட்டு, காய்கள் கட் பண்ணேன்..30 நிமிடங்கள்ல மொத்த வேலையும் ரொம்ப ஈஸியா வேலை முடிந்தது..சுடச்சுட சாப்பாடு ரெடி!

தேவையான பொருட்கள்
கேரட்(சிறியது)-1
பீன்ஸ்-7 (அதென்ன கணக்குன்னு கேக்கப்படாது,என்னோட லக்கி நம்பர் 7..ஸோ, ஏழு பீன்ஸ்)
பட்டாணி- சுமாரா 50
வெங்காயம்(சிறியது)-1
பச்சைமிளகாய்-2
மஞ்சள்தூள்-1/4ஸ்பூன்
மிளகாய்த்தூள்-1 ஸ்பூன்
M.D.H.கறி பவுடர்-1/2 ஸ்பூன்
பால் -1/4கப் (தேங்காய்ப்பால் இல்ல..பசும் பால்)
உப்பு

செய்முறை
கேரட்-பீன்ஸை நடுத்தரமான அளவில் நறுக்கவும்.ஒரு மைக்ரோவேவ் ஸேஃப் பவுலில் கேரட்-பீன்ஸுடன் சிறிது தண்ணீர் சேர்த்து மைக்ரோவேவில் வேகவைக்கவும்.

காய்கள் வேகும் நேரத்தில் வெங்காயம்-மிளகாயைப் பொடியாக நறுக்கவும்.
கேரட்-பீன்ஸூடன் பட்டாணி,வெங்காயம் மிளகாய் சேர்த்து 2 நிமிடம் மைக்ரோவேவில் வைக்கவும்.

இந்த டைம்கேப்ல உப்பு,ம.தூள்,மி.தூள் இவற்றை ரெடியாக எடுத்துவைக்கவும். கேரட் பீன்ஸ் பட்டாணி வெங்காயம் மிளகாய் கலவையுடன் ம.தூள்,மி.தூள்,உப்பு சேர்த்து மேலும் 2 நிமிடம் வைக்கவும்.

2 நிமிடம் கழித்து,காய்களுடன் பாலை சேர்த்து கலந்து மேலும் 3 நிமிடம் வைக்கவும்.

3 நிமிடங்கள் கழித்து மைக்ரோவேவிலிருந்து குழம்பை எடுத்து M.D.H.கறி பவுடர் சேர்த்து ஒரு நிமிடம் மைக்ரோவேவ் செய்யவும்.

அவ்ளோதாங்க..வெள்ளை கறி ரெடி!

குறிப்பு

• யாரும் சிறிய கேரட்,சிறிய வெங்காயம்-னா என்னன்னு சந்தேகம் கேக்கமாட்டீங்கன்னு நம்பறேன். கேக்கறதுன்னா சொல்லுங்க..ஆனியன் சந்தேகத்த ஆல்ரெடி தீர்த்துட்டேன்.பேபி கேரட்ல ஆரம்பிச்சு ஒரு கேரட் ஆராய்ச்சி பண்ணிடலாம். ஹிஹி
• பட்டாணிய எண்ணியெல்லாம் போட வேண்டாங்க.சும்மா, குத்துமதிப்பா,கையிலே ஒரு நாம்பல்[இது எங்கூரு பழக்கம்..ஒரு நாம்பல்=ஒரு கைப்பிடி] எடுத்துப்போடுங்க,போதும்.
• வெ.கறில பால் சேர்த்து வைக்கும்போது எப்படி மூடி வைத்தாலும், பொங்கி மைக்ரோவேவ்ல கொஞ்சம் சிந்தும்.அதையெல்லாம் கண்டுக்காம க்ளீன் பண்ணிடுங்க. [ஸ்டவையே தொடாம சமையல் முடிச்சிருக்கோம், நிமிஷத்துல இதய க்ளீன் பண்ணிடமாட்டமா? :)]
  
• இன்னொரு விஷயம்,ரெசிப்பில சொல்லிருக்க டைம் முடிந்ததும் பொடக்குன்னு மைக்ரோவேவைத் திறந்துரக் கூடாது.ஒரு நிமிஷம் ஸ்டேண்டிங் டைம் குடுத்து நிதானமா திறங்க.அப்பதான் காய்கள் நல்லா வேகும்.
  

சமையலை முடித்ததும் ரெசிப்பி சொன்னவுகளுக்கு போட்டோவ அனுப்பினேன். சூப்பரா இருக்குதுன்னு சர்டிபிகேட் குடுத்துட்டாங்க.அதனால நீங்களும் தைரியமா செய்யலாம்.ஒரு அவசர-ஆத்திரத்துக்கு டக்குன்னு அரைமணி நேரத்துல சமையலை முடிச்சுடலாம்ல??:)

ஹேப்பி வீகெண்ட் மக்களே!