வெஜ் பேஸ்ட்ரி வீல்ஸ்

தேவையான பொருட்கள்
பஃப் பேஸ்ட்ரி ஷீட் -2
கேரட் - 2
பீன்ஸ் -10
உருளைகிழங்கு - 1
ப்ரோஸன் பச்சைப் பட்டாணி -1/4கப்
மிளகாய்த்தூள் -1 1/2ஸ்பூன்
மல்லித்தூள் -1ஸ்பூன்
சீரகத்தூள் -1/2ஸ்பூன்
சோம்புத்தூள் -1/2ஸ்பூன்
மஞ்சள்தூள் -1/4ஸ்பூன்
இஞ்சி-பூண்டு விழுது -2ஸ்பூன்
பச்சை மிளகாய் -1
கொத்துமல்லி இலை -சிறிது
சீரகம் - 3/4ஸ்பூன்
எண்ணெய் -1ஸ்பூன்
சர்க்கரை-1/2ஸ்பூன்
உப்பு
முட்டை -1




















செய்முறை

கேரட்,பீன்ஸ்,உருளைக் கிழங்கு,பச்சைமிளகாயைப் பொடியாக நறுக்கவும்.

பேஸ்ட்ரி ஷீட்டை முக்கால் மணி நேரம் முன்பாக பிரீசரில் இருந்து வெளியே எடுத்து வைக்கவும்.


குக்கரில் நறுக்கிய காய்கறிகள்,பட்டாணி,பச்சைமிளகாய்,மிளகாய்த்தூள்,மல்லித்தூள்,சீரகத்தூள்,சோம்புத்தூள், மஞ்சள்தூள்,சர்க்கரை,உப்பு சேர்த்து முக்கால் டம்ளர் தண்ணீர் சேர்த்து இரண்டு விசில் வைக்கவும்.பிரெஸ்சர் அடங்கியதும் குக்கரைத் திறந்து காய்களை மசித்து வைக்கவும்.

எண்ணெய் காயவைத்து சீரகம் தாளித்து மசித்த கலவையை சேர்த்து தண்ணீர் வற்றும்வரை கிளறவும்.இறுதியாக கொத்துமல்லி இலை தூவி இறக்கி ஆறவைக்கவும்.

மாவு தூவி பேஸ்ட்ரி ஷீட்-ஐ சதுரமாகத் தேய்த்துக் கொள்ளவும்.காய்கறி கலவையை பேஸ்ட்ரி ஷீட்டில் வைத்து (நான்கு ஓரங்களிலும் ஒரு இன்ச் இடம் விட்டு) சமமாகப் பரப்பவும்.


பேஸ்ட்ரி ஷீட்டை ஒரு முனையிலிருந்து இறுக்கமாகச் சுற்றவும். ஷீட்டின் இறுதியில் சிறிது தண்ணீர் தடவி ஒட்டவும்.


ரோல் செய்த பேஸ்ட்ரி ஷீட்டை கிளியர் ராப் பேப்பரில் வைத்து சுற்றி பதினைந்து நிமிடம் ப்ரீசரில் வைக்கவும்.
முட்டையை உடைத்து ஒரு ஸ்பூன் தண்ணீர் சேர்த்து நன்றாக கலக்கிவைக்கவும்.
பேஸ்ட்ரி ரோல்-ஐ பிரீசரில் இருந்து எடுத்து முட்டையை ரோல் முழுவதும் தடவவும்.

பின்னர் கத்தியால் வேண்டிய வடிவத்தில் நறுக்கி
பேக்கிங் ட்ரேயில் சிறிது இடைவெளி விட்டு அடுக்கவும்.

350F ப்ரீ ஹீட் செய்த அவன்-ல் வைத்து பேக் செய்யவும்.
பத்து நிமிடம் கழித்து ட்ரேயை எடுத்து பேஸ்ட்ரி வீல்களை திருப்பி அடுக்கி மீண்டும் பத்து நிமிடம் பேக் செய்யவும்.டேஸ்ட்டி வெஜ் பேஸ்ட்ரி வீல் ரெடி!


குறிப்பு
முட்டை விரும்பாதவர்கள் எக்வாஷ்-க்கு பதிலாக சிறிது வெண்ணையை உருக்கி ரோல் மீது தடவி பேக் செய்யலாம்.
பேஸ்ட்ரி ரோலை எக் வாஷ் கொடுத்து நறுக்குவதை விட, நறுக்கிய பின்னர் எக் வாஷ் செய்தால் ஈசியாக இருக்கும்.
ஸ் டஃபிங் அவரவர் விருப்பபடி, வெஜ் அல்லது நான்வெஜ் கலவை வைத்துக்கொள்ளலாம். சீஸ் விரும்புவோர் சீஸ் வைத்தும் பேக் செய்யலாம்.

இந்தவாரம் பாட்லக் ...

இந்த வாரம் பாட்லக்கிற்கு எங்க வீட்டிலிருந்து கொண்டு சென்ற உணவு வகைகள்..

ரஸமலாய்

<<<<<<~~~~~>>>>>

அரிசிம்பருப்பு சாதம்

<<<<<<~~~~~>>>>>

வெஜ் பேஸ்ட்ரி வீல்ஸ்

லென்டில்-ப்ரோக்கலி குருமா

தேவையான பொருட்கள்
லென்டில் -1/4கப்
ப்ரோகலி - 150 கிராம்
வெங்காயம் - பாதி
பச்சைமிளகாய் -1
தக்காளி - 1
புளி - சிறிய கொட்டைப்பாக்களவு
இஞ்சி -1 இன்ச் துண்டு
மிளகாய்த்தூள் -1 1/4ஸ்பூன்
மல்லித்தூள் -1/2ஸ்பூன்
சீரகத்தூள் -1/2ஸ்பூன்
தேங்காய்ப்பால் பவுடர்- 1 1/2ஸ்பூன்
மஞ்சள்தூள் -1/4ஸ்பூன்
சீரகம் -1/2ஸ்பூன்
நெய்-1/2ஸ்பூன்
உப்பு

செய்முறை
வெங்காயம்,தக்காளி இஞ்சி,பச்சைமிளகாயைப் பொடியாக நறுக்கிக் கொள்ளவும்.

குக்கரில் ப்ரோக்கலி,லென்டில்,நறுக்கிய தக்காளி,பச்சை மிளகாய்,இஞ்சி, வெங்காயம், சீரகம்,மஞ்சள்தூள்,புளி சேர்த்து முக்கால் கப் தண்ணீர் ஊற்றி இரண்டு விசில் வைக்கவும்.

பிரெஸ்சர் அடங்கியதும் குக்கரைத் திறந்து லென்டில் -பிராக்கலி கலவையை லேசாக மசித்து விட்டு,மிளகாய்த்தூள்,மல்லித்தூள்,சீரகத்தூள்,உப்பு,தேங்காய்ப்பால் பவுடர் சேர்த்து பச்சை வாசனை போக கொதிக்க விடவும்.

இறுதியாக அரை ஸ்பூன் நெய் சேர்த்து கொத்துமல்லி இலை தூவி இறக்கவும்.

இது சப்பாத்தி, நாண் இவற்றுக்கு பொருத்தமான சைட் டிஷ்.

விரைவாக செய்துவிடலாம்..லென்டில்-இல் நார்ச்சத்து அதிகம்,ப்ரோக்கலியில் இரும்புச் சத்து அதிகம்...இரண்டையும் சேர்த்து செய்வதால் இது ஒரு டேஸ்ட்டி & ஹெல்த்தி டிஷ்.

வெண்டைக்காய் ஃப்ரை

தேவையான பொருட்கள்
வெண்டைக்காய் -12
மீடியம் சைஸ் வெங்காயத்தில் கால்வாசி
தேங்காய்த்துறுவல் -2ஸ்பூன்
சீரகம் - 1/2ஸ்பூன்
மிளகாய்த்தூள் -1 1/2ஸ்பூன்
உப்பு
எண்ணெய்

செய்முறை
வெண்டைக்காயின் முனைகளை நறுக்கி நீளவாக்கில் பிளந்து கொள்ளவும்.
தேங்காய்த்துறுவல்,சீரகம்,வெங்காயம் இவற்றை(தண்ணீர் சேர்க்காமல்) மிக்சியில் கொரகொரப்பாக அரைத்து வைக்கவும்.
எண்ணெய் காயவைத்து வெண்டைக்காய்களை வதக்கவும்.
காய் முக்கால் பாகம் வதங்கியதும் உப்பு, மிளகாய்த்தூள் சேர்க்கவும்.
பின்னர் பொடித்து வைத்த வெங்காயம்+சீரகம்+தேங்காய்த் துறுவலை சேர்த்து மிதமான தீயில் கிளறவும்.
பச்சை வாசனை அடங்கியதும் இறக்கவும்.
டேஸ்ட்டி வெண்டைக்காய் ஃப்ரை தயார். இது சப்பாத்தியுடன் சாப்பிட சுவையாய் இருக்கும்.சாதத்துடனும் மேட்ச் ஆகும்.

மைசூர் போண்டா

தேவையான பொருட்கள்
மைதா மாவு /ஆல்பர்ப்பஸ் ப்ளோர் -1கப்
பேக்கிங் சோடா- 2சிட்டிகை
தயிர் -1கப்
வெங்காயம் (மீடியம் சைஸ்) -1
பச்சைமிளகாய் - 4(காரத்துக்கேற்ப)
தேங்காய்ப்பல் - 1/4கப்
கறிவேப்பிலை,கொத்துமல்லி இலை -சிறிது
உப்பு
எண்ணெய்

செய்முறை
மாவுடன் பேக்கிங் சோடாவை நன்றாக கலந்துகொள்ளவும்.

வெங்காயம்,பச்சை மிளகாய்,கறிவேப்பிலை,கொத்துமல்லி இலை இவற்றை பொடியாக நறுக்கி மாவுடன் சேர்க்கவும்.உப்பு,தேங்காயையும் சேர்க்கவும்.

அத்துடன் சிறிது சிறிதாக தயிரைச் சேர்த்து கலந்து ஐந்து நிமிடங்கள் வைக்கவும்.


மிதமான சூட்டில் எண்ணெய் காயவைத்து மாவை சிறு உருண்டைகளாக உருட்டி, பொன்னிறமாகப் பொரித்தெடுக்கவும்.



விரைவில் செய்யக்கூடிய மாலை நேர சிற்றுண்டி..தயிர் சேர்ப்பதால் லேசான புளிப்பு சுவையுடன், தேங்காயும் சேர்ப்பதால் நன்றாக இருக்கும்.

நான் மாவை ஸ்பூனால் எடுத்து போட்டு பொரித்திருப்பதால் போண்டா ஷேப் கொஞ்சம் ஒரு மாதிரியா:) இருக்கு..பொறுமை இருப்பவர்கள் கையில் தண்ணீர் தொட்டுக்கொண்டு மாவை உருண்டையாக உருட்டிப் போடுங்க. ஹி,ஹி!!!

தேங்காய் சட்னி-1

தேவையான பொருட்கள்
தேங்காய் துருவல் - அரை கப்
பொட்டுக்கடலை - 2 ஸ்பூன்
பச்சைமிளகாய் - 3
இஞ்சி - 1இன்ச் துண்டு
கறிவேப்பிலை,கொத்துமல்லி இலை -சிறிது
உப்பு
தாளிக்க
தேங்காயெண்ணெய் -1ஸ்பூன்
கடுகு -1/2ஸ்பூன்
உளுந்துப் பருப்பு - 1/2ஸ்பூன்
கறிவேப்பிலை - 4இலைகள்

செய்முறை
தேங்காய் முதல் உப்பு வரையுள்ள பொருட்களை கொஞ்சமாகத் தண்ணீர் சேர்த்து நைசாக அரைத்தெடுக்கவும்.

எண்ணெய் காய வைத்து தாளிக்க வேண்டிய பொருட்களைத் தாளித்துக் கொட்டவும்.

சுவையான தேங்காய் சட்னி தயார்..இது இட்லி,தோசை,சுடுசாதம் இவற்றுக்கு நன்றாக இருக்கும்.

ஆரஞ்ச் கப்கேக்

தேவையான பொருட்கள்
செல்ப் ரைசிங் ப்ளோர் - 2கப்
பேக்கிங் சோடா-1/4ஸ்பூன்
சர்க்கரை-1கப்
ஆரஞ்ச் பழம்-2
மஞ்சள் மற்றும் சிவப்பு கலர்-சில துளிகள்
முட்டை-3
வெண்ணெய்-115 கிராம்
(முட்டையும்,வெண்ணெயும் ரூம் டெம்பரேச்சரில் இருக்க வேண்டும்)

செய்முறை
மாவுடன் பேக்கிங் சோடா சேர்த்து சலித்துக்கொள்ளவும்.

ஆரஞ்சுப் பழங்களின் தோலை காய்துருவியில் துருவி வைக்கவும். பழங்களைப் பிழிந்து ஜூஸ் எடுத்து வைக்கவும்.

வெண்ணெயை எலக்ட்ரிக் பீட்டர் கொண்டு கலக்கவும். வெண்ணெய் கொஞ்சம் மென்மையானதும் சர்க்கரையை சிறிது சிறிதாகச் சேர்த்து கலக்கவும்.

சர்க்கரை,வெண்ணெய் சேர்ந்து உளுந்துமாவு பதத்துக்கு வரும் வரை கலக்கவும்.

முட்டைகளை ஒவ்வொன்றாக உடைத்து மஞ்சள் கருக்களை மட்டும் வெண்ணெய்+சர்க்கரை கலவையுடன் சேர்க்கவும். வெள்ளைகருக்களை தனியாக வைக்கவும்.

துளிகள் சிவப்பு மற்றும் துளிகள் மஞ்சள் நிறத்தையும் சேர்த்து கலக்கவும். நன்கு கலந்தபின்னர் ஆரஞ்ச் ஜூசையும் சேர்த்து கலக்கவும்.

மாவை சிறிது சிறிதாகச் சேர்த்து விஸ்க் கொண்டு மெதுவாக கலக்கவும்.

வெள்ளைக் கருவை நன்றாக நுரைக்கும்படி கலந்து மாவுக் கலவையுடன் சேர்த்து கலக்கவும்.

இறுதியாக துருவிய ஆரஞ்சுத் தோல் சேர்த்து கலக்கவும்.

கப் கேக் பானில் லைனர் வைத்து ஒரொரு கப்பிலும் முக்கால் பாகம் கேக் மிக்ஸ்-ஐ வைக்கவும்.

350Fப்ரீஹீட் செய்த அவனில் 35நிமிடங்கள் வைத்து பேக் செய்யவும்.

கப்கேக் ரெடியாகிவிடும். அதனை நன்றாக ஆறவிட்டு(2மணி நேரங்கள்) உங்களுக்கு விருப்பமான ஐசிங் கொண்டு அலங்கரிக்கவும்.

காரா பூந்தி

தேவையான பொருட்கள்
கடலை மாவு - 1கப்
பேக்கிங் சோடா - 2சிட்டிகை
மஞ்சள் கலர் - 7 துளி
தண்ணீர் - 140ml
கறிவேப்பிலை
முந்திரி - 10
மிளகாய்த்தூள் - 1 ஸ்பூன்
பெருங்காயத்தூள் - 1/4ஸ்பூன்
உப்பு

செய்முறை
கடலை மாவுடன் பேக்கிங் சோடா கலந்து, தண்ணீரை சிறிது சிறிதாக சேர்த்து கட்டியில்லாமல் கலக்கவும். மஞ்சள் கலரையும் மாவுடன் கலந்துகொள்ளவும்.

மிதமான சூட்டில் எண்ணெய் காய வைத்து பூந்தி கரண்டியில் மாவை ஊற்றி பொரித்தெடுக்கவும்.
இறுதியாக கறிவேப்பிலைகளையும்,முந்திரியை

யும் பொரித்து எடுத்துக்கொள்ளவும்.

பொரித்து வைத்த பூந்தியுடன் மிளகாய்த்தூள்,பெருங்காயத்தூள்,உப்பு, பொரித்த கறிவேப்பிலை,முந்திரி சேர்த்து நன்றாக கலக்கவும்.

காரசாரமான மொறு-மொறு காரா பூந்தி ரெடி!

கார சட்னி-1

தேவையான பொருட்கள்
கடலைப்பருப்பு - 1 டேபிள் ஸ்பூன்
காய்ந்த மிளகாய் - 5
வெங்காயம் - பாதி
தக்காளி - 1
தனியா (கொத்தமல்லி விதை) - 1 ஸ்பூன்
சீரகம் - 1 ஸ்பூன்
புளி - சிறிய கொட்டைப்பாக்களவு
தேங்காய் துருவல் - 3 ஸ்பூன்
உப்பு,எண்ணெய்
கறிவேப்பிலை,கொத்தமல்லி இலை - சிறிது

செய்முறை
வெங்காயம்,தக்காளியைப் பொடியாக நறுக்கிக் கொள்ளவும்.
எண்ணெய் காயவைத்து கடலைப்பருப்பை பொன்னிறமாக வறுக்கவும். தனியா,சீரகம் சேர்த்து பொரிய விடவும்.
காய்ந்த மிளகாய்,வெங்காயம்,கறிவேப்பிலை,புளி,தக்காளி இவற்றை வரிசையாக சேர்த்து வதக்கவும்.
தக்காளி வதங்கிய பின்னர் தேங்காய்த் துருவல் சேர்த்து மிதமான தீயில் மூன்று நிமிடம் வதக்கவும்.
இறுதியாக கொத்துமல்லி இலை சேர்த்து இறக்கி ஆறவைக்கவும். தேவையான உப்பு சேர்த்து நைசாக அரைத்தெடுக்கவும்.
காரசாரமான சட்னி ரெடி. இது இட்லி,தோசைக்கு நன்றாக இருக்கும்.

டிபன் சாம்பார்

தேவையான பொருட்கள்
துவரம் பருப்பு - 1/4கப்
வெங்காயம் - பாதி
தக்காளி - 2 (மீடியம் சைஸ்)
பச்சை மிளகாய் - 1
கடுகு -1/2ஸ்பூன்
சீரகம் -1/2ஸ்பூன்
காய்ந்த மிளகாய் - 1
மஞ்சள்தூள் - 1/2ஸ்பூன்
பெருங்காயத்தூள் - 1/4ஸ்பூன்
புளிக்கரைசல் - 1/4கப்
சாம்பார்த்தூள் - 1 1/2ஸ்பூன்
சர்க்கரை - 1/2ஸ்பூன்
எண்ணெய் - 1ஸ்பூன்
உப்பு
கறிவேப்பிலை,கொத்துமல்லி இலை-சிறிது

செய்முறை
பருப்புடன் கால் ஸ்பூன் மஞ்சள்தூள், இரண்டு மூன்று சொட்டு எண்ணெய் சேர்த்து குக்கரில் வேக வைத்துக் கொள்ளவும்.

வெங்காயம் - பச்சை மிளகாயை நீளவாக்கில் நறுக்கிக் கொள்ளவும். தக்காளியைப் பொடியாக நறுக்கி வைக்கவும்.

கடாயில் கடுகு,சீரகம், பெருங்காயத்தூள் தாளித்து காய்ந்த மிளகாய், வெங்காயம்,பச்சை மிளகாய் கறிவேப்பிலை சேர்த்து வதக்கவும்.

பின்னர் தக்காளி, மஞ்சள் தூள் சேர்த்து ஒரு நிமிடம் வதக்கி, புளிக்கரைசலை ஊற்றி, உப்பு மற்றும் ஒரு கப் தண்ணீர் சேர்த்து கொதிக்க விடவும்.

எல்லாம் நன்கு வெந்ததும் வெந்த பருப்பை நன்றாக மசித்து சாம்பாருடன் சேர்த்து கொதிக்க விடவும்.

கொதிக்க ஆரம்பித்ததும் சாம்பார்த்தூள் சேர்த்து அடுப்பை குறைந்த சூட்டில் வைக்கவும்.

சாம்பார் நுரைக்கட்ட ஆரம்பித்ததும் சர்க்கரை சேர்த்து இரண்டு நிமிடம் லோ ஹீட்டில் வைத்து கொத்துமல்லி இலை தூவி அடுப்பிலிருந்து இறக்கவும்.

கம-கம டிபன் சாம்பார் தயார்..இட்லி,தோசை,ஊத்தப்பம்,பொங்கல், உப்புமா, கிச்சடி இவற்றுக்கு பொருத்தமான ஜோடி இந்த சாம்பார்.

குறிப்பு

• எப்பொழுதும் சாம்பார் பொடி சேர்த்ததும், நிறைய நேரம் சாம்பாரை கொதிக்க விடக் கூடாது.நுரைக் கட்ட ஆரம்பித்ததுமே அடுப்பிலிருந்து இறக்கிவிடவேண்டும்.
  
• சாம்பார் கெட்டியாக இருக்காது. திக்காக வேண்டும் என்றால் தண்ணீரின் அளவைக் குறைத்துக்கொள்ளவும்.

இந்த முறை ஊரிலிருந்து சக்தி சாம்பார் பொடி வாங்கி வந்திருக்கிறேன்..என்னதான் எம்.டி.ஆர். சாம்பார் பொடி உபயோகித்தாலும் நம்ம ஊர் சாம்பார் டேஸ்ட் தனிதான்! :) எம்.டி.ஆர்-ல பட்டை கிராம்பு சேர்த்திருப்பதால் கொஞ்சம் கர்நாடகா சாம்பார் டேஸ்ட் வந்துடும்..அன்ன பூர்ணா சாம்பார் பொடி, சக்தி சாம்பார் பொடி இரண்டும் வாங்கி யூஸ் பண்ணிபாருங்க..உங்களுக்கே வித்யாசம் தெரியும்.

தொடரும் மொக்கை...

இட்லி,தோசை பற்றிய காமெடி பதிவுல நான் போட்டிருந்த மூன்று (தோசை) போட்டோக்களும் ஒன்றேவா என்று ஒருவர்:) கேள்வி எழுப்பியிருந்தார்.இருங்க,இருங்க..உடனே ஓடிப் போயி அங்க பின்னூட்டம் இருக்கான்னு தேடாதீங்க..அவங்க கேட்டது மெயில்ல. ஆக்சுவலி அந்த போட்டோஸ்ல இருந்த தோசைகள் அதேதான்..கேமரா ஏங்கிள் மட்டும் வேற,வேற. :)

இருந்தாலும் இப்படி ஒரு கேள்வி வந்தப்புறம் எப்படி அமைதியா இருக்கறது? என் மொக்கையத் தொடர இன்னும் ஒரு பொன்னான வாய்ப்பா இதைப் பயன்படுத்திக் கொண்டிருக்கிறேன்.ஹி,ஹி!!

இது இன்னிக்கு காலைல சுட்ட தோசைங்க..சுடச் சுட அப்லோட் பண்ணிருக்கேன்.எல்லாரும் சாப்பிட வாங்க!

தோசை & கார சட்னி
இவ்வளவும் ஆனப்புறம் அந்த வம்பு புடிச்ச தோசைக்கல்லை உங்களுக்கு காட்டலைன்னா அதுக்கு கோபம் வந்துடாது?? இதோ..எங்க வீட்டு தவா..தோசைக்கல்..க்ரிடில்!!!


மகி'ஸ் கிச்சன்-னு ப்ளாக் நேம் இருக்கறதால டெய்லி சுடற இட்லி-தோசையைப் பத்தி ஒண்ணில்ல,ரெண்டில்ல, கூச்சப்படாம மூணு(!!??) பதிவு எழுதிருக்கேன்..நீங்களும் கூச்சப்படாம வந்து சாப்ட்டுட்டுப் போங்க.
நன்றி!

கத்தரிக்காய் மசாலா கறி

தேவையான பொருட்கள்
கத்தரிக்காய் - 12
வெங்காயம் - 1
தக்காளி - 2
பச்சை மிளகாய் - 2
இஞ்சி-பூண்டு விழுது- 1 1/2 ஸ்பூன்
கறிவேப்பிலை,கொத்துமல்லி இலை-சிறிது
மிளகாய்த்தூள் - 1 1/2ஸ்பூன்
மல்லித்தூள் - 1 ஸ்பூன்
மஞ்சள்தூள் - 1/2ஸ்பூன்
கடுகு -3/4 ஸ்பூன்
சீரகம் - 1/2ஸ்பூன்
புளிக்கரைசல் -1/4கப்
உப்பு
எண்ணெய் - 3டேபிள் ஸ்பூன்
அரைக்க
தேங்காய்த் துருவல் - 1/4கப்
தனியா(கொத்தமல்லிவிதை) - 1 1/2ஸ்பூன்
மிளகு - 1/2ஸ்பூன்
சீரகம் - 1ஸ்பூன்

செய்முறை
கத்தரிக்காயை காம்பு நீக்கி, முழுவதும் நறுக்காமல் நான்காகப் பிளந்து கொள்ளவும்.
வெங்காயம்,மிளகாய்,தக்காளியைப் பொடியாக நறுக்கி வைக்கவும்.
கடாயில் ஒரு டேபிள்ஸ்பூன் எண்ணெய் காயவைத்து நறுக்கிய கத்தரிக்காய்களை சில நிமிடம் வதக்கி எடுத்து ஆறவைக்கவும்.
அரைக்கக் கொடுத்துள்ள பொருட்களை கொஞ்சமாகத் தண்ணீர் சேர்த்து நைசாக அரைக்கவும்.
அரைத்த விழுதை கத்தரிக்காய்களில் ஸ்டஃப் செய்யவும்.
கடாயில் மீதி எண்ணெயைக் காயவைத்து கடுகு,சீரகம் தாளித்து வெங்காயம்,கறிவேப்பிலை,பச்சை மிளகாயை சேர்த்து வதக்கவும். வெங்காயம் வதங்கியதும் இஞ்சி-பூண்டு விழுது சேர்த்து வதக்கவும்.
பின்னர் தக்காளி,மஞ்சள்தூள் சேர்த்து வதக்கவும்.
தக்காளி குழைய வதங்கியதும், மிளகாய்தூள்-மல்லித்தூள் சேர்த்து எண்ணெய் மிதக்கும் வரை மிதமான தீயில் வதக்கவும்.
தேவையான உப்பு சேர்த்து செய்த கத்தரிக்காய்களை சேர்த்து மூன்று நிமிடம் வதக்கவும்.
மீதமுள்ள தேங்காய் விழுதை ஊற்றி கொதிக்க விடவும்.
நன்கு கொதி வந்ததும் புளிக்கரைசலை ஊற்றி, கொதிக்கவிடவும்.
எல்லாம் சேர்ந்தது கிரேவி பதம் வந்தது எண்ணெய் மிதக்க ஆரம்பித்ததும் மல்லி இலை தூவி இறக்கவும்.
சுவையான கத்தரிக்காய் மசாலா தயார்..இது சப்பாத்தி,சாதம் இரண்டுக்குமே பொருத்தமாய் இருக்கும். இட்லி,தோசைக்கும் தொட்டு சாப்பிடலாம்.

குறிப்பு

• சமைக்கும் நேரம் முழுவதுமே அடுப்பை மிதமான தீயில் வைத்துக் கொள்ளவும். (பொதுவாகவே ஸ்லோ குக்கிங் உணவின் சுவையை அதிகரிக்கும்)
• கத்தரிக்காய்களை கழுவி, பேப்பர் டவலில் நன்கு துடைத்து நறுக்கியவுடன் வதக்கிஎடுத்துவைக்கவும். நறுக்கி தண்ணீரில் போட்டு வைக்கவேண்டாம்.