வெங்காயத்தாள் பருப்பு & வெங்காயத்தாள்-முட்டை பொரியல்

சிலபல மாதங்கள் முன் கடையில் வாங்கிவந்த ஸ்ப்ரிங் ஆனியனின் வேர்களைத் தொட்டியில் நட்டு வளர்ப்பதைப் பற்றி இங்கே எழுதியிருந்தேன். அந்த வெங்காயத்தாள்களை ஒரு முறை (வேரை விட்டுவிட்டு) நறுக்கி சமைத்தேன். பிறகு நேரமில்லாமல் அப்படியே விட்டிருந்தேன். 

இப்போது ஊருக்குப் போய்விட்டு வந்த போது ஒரு தொட்டியில் இருந்த வெ.தாள்கள் ரொம்பவே போஷாக்காக:) வளரத்துவங்கின.

 பறித்து சமைப்போம் என பசுமையான தாள்களை மட்டிலும் (வேரை விட்டுவிட்டு) நறுக்கி எடுத்தேன்..

நறுக்கும்போது தெரியவில்லை, உள்ளே கொணர்ந்து கழுவி எடுத்ததும் ஒரே முறையில் சமைத்து தீர்க்க முடியாது எனத்தோன்றியதால் இரண்டு ரெசிப்பிகள்  உருவெடுத்து உங்களைக் காண வருகின்றன.

வெங்காயத்தாள் பருப்பு ( step-by-step படங்களுடன் ஆங்கிலத்தில் ரெசிப்பி இங்கே)
தேவையான பொருட்கள்
வேகவைத்த பாசிப்பருப்பு (1/4 கப் பாசிப்பருப்பை தேவையான தண்ணீர் விட்டு குழைய வேகவைத்துக்கொள்ளவும்)
நறுக்கிய வெங்காயத்தாள்-1/2கப்
சீரகம்-1டீஸ்பூன்
மஞ்சள்தூள்-1/4டீஸ்பூன்
வர மிளகாய்-3
பச்சைமிளகாய்-1
எண்ணெய்
உப்பு
நெய்-1டீஸ்பூன்

செய்முறை
பாத்திரத்தில் எண்ணெய் காயவைத்து சீரகம் தாளித்து, பச்சைமிளகாய்-வரமிளகாய் சேர்க்கவும். சில விநாடிகளின் பின்னர் நறுக்கிய வெங்காயத்தாளைச் சேர்த்து வதக்கவும்.
தேவையான உப்பு மற்றும் மஞ்சள்தூள் சேர்த்து குறைந்த தீயில் ஓரிரு நிமிடம் வதக்கவும்.
வெந்து மசித்த பருப்பினைச் சேர்த்து ஒரு கொதி விடவும்.
அடுப்பிலிருந்து இறக்கி நெய்யை மேலாகச் சேர்த்து சூடாகப் பரிமாறவும்.

~~~

வெ.தாள்-முட்டை பொரியல் (இந்தப் பொரியலில் முட்டைக்கு பதிலாக தேங்காய்த் துருவல் சேர்த்தும் செய்யலாம். அதற்கான குறிப்பு ஆங்கிலத்தில் இங்கே)
தேவையான பொருட்கள்
நறுக்கிய வெங்காயம் -1டேபிள்ஸ்பூன்
வரமிளகாய்-4 (காரத்துக்கேற்ப)
சுத்தம் செய்து நறுக்கிய வெ.தாள்-1கப்
கடுகு-1/2டீஸ்பூன்
க.பருப்பு, உ.பருப்பு- தலா 1/2டீஸ்பூன்
முட்டை -1
உப்பு
எண்ணெய்

செய்முறை
கடாயில் எண்ணெய் காயவைத்து கடுகு தாளித்து, க.பருப்பு-உ.பருப்பு சேர்த்து பொன்னிறமாகும் வரை வதக்கவும். பிறகு நறுக்கிய வெங்காயத்தைச் சேர்த்து லேசாக வதக்கிவிட்டு, நறுக்கிய வெங்காயத்தாளைச் சேர்க்கவும்.

வெங்காயத்தாள் சில நிமிடங்களிலேயே வதங்கிவிடும். பிறகு முட்டையை உடைத்து ஊற்றி கிளறிவிடவும்.
முட்டை வெந்ததும் அடுப்பிலிருந்து இறக்கி பரிமாறவும்.

சுடுசாதத்தில் அப்படியே பிசைந்து சாப்பிட நன்றாக இருக்கும். பொரியலாகவும், சப்பாத்திக்குத் தொட்டு சாப்பிடவும் நன்றாக இருக்கும். 

How to grow Methi at home?-வீட்டில் வெந்தயக் கீரை வளர்ப்பது எப்படி?

வெந்தயம் சீக்கிரமாகவே முளைவிட்டு செழிப்பாக வளரக் கூடியது. முன்பே ஒரு முறை வெந்தயம் வளர்க்க முயற்சித்து சில பாடங்கள் கற்றுக்கொண்டேன், இந்த முறை இன்னும் சில அனுபவப் பாடங்கள். முதல் முறை வெந்தயக்கீரை வளர்க்க விரும்புவோருக்கும் உதவியாக இருக்கலாம் என்ற எண்ணத்தில் இங்கே பகிர்கிறேன்.

~~~

தேவையான அளவு வெந்தயத்தை  முதல் நாளிரவே தண்ணீரில் ஊறப்போட்டு வைத்து மறுநாள் விதைக்கலாம். நான் சுமார் 11/2 டேபிள்ஸ்பூன் வெந்தயத்தை ஊறவிட்டேன். [இது ஆப்ஷனல் ஸ்டெப்..வெந்தயத்தை டைரக்ட்டாக தூவினாலும் முளைத்துவிடும்.]

மறுநாள் காலை தொட்டிகளில் மண்ணை 3/4பாகத்துக்கும் கொஞ்சம் குறைவாக நிரப்பி ஊறிய வெந்தயத்தைத் தூவி விட்டு,  மேலே இன்னும் கொஞ்சம் மண்ணையும் தூவி விட்டு தண்ணீர் விட்டேன். விதைத்த மூன்றாம் நாளே சிறு துளிர்கள் வெளிப்பட்டன. பிறகு வெந்தய நாற்றுக்கள் தளிர்த்து வளர ஆரம்பித்தன. 

இரண்டு வாரங்கள் கழித்த பிறகுதான் நான் செய்த கோக்கு-மாக்கு:) பிடிபட்டது எனக்கு. வெந்தயத்தை   மிகவும் நெருக்கமாகத் தூவியிருக்கிறேன். முளைவிட்ட நாற்றுக்கள் உயிர்பிடித்து வளரப் போதுமான இடமில்லாமல் நெருக்கியடித்துக்கொண்டு தழைந்துகொண்டிருந்தன. அவ்வ்வ்வ்வ்வ்வ்!!! ஆனால் பார்ப்பதற்கு மிகவும் அழகாக இருந்தது. ;) முன்பு வெந்தயம் நட்டபொழுதும் இதே தவறைச் செய்திருந்தேன், அப்ப எவ்வளவு அயகா;) வந்திருக்கு பாருங்க..

சில நாற்றுக்கள் முளைத்த இடத்திலிருந்து பிரித்து நடப்படும்போது நன்றாக வளரும் குணம் கொண்டவை. ஆனால் வெந்தயம் அப்படியில்லை. ஓரிடத்தில் முளைத்தால் அங்கு மட்டுமே வளரக்கூடியது. இடம் மாற்றி நட்டால் அப்படியே வாடிப்போய்விடும். இந்த விஷயம் தெரியாமல் இவ்வளவு அழகாக முளைத்திருந்த நாற்றுக்களைப் பிரித்து மண்ணில் நான்கைந்து இடங்களில் நட்டேன், அப்படியே வாடி வறண்டு போய்விட்டன வெந்தயச் செடிகள்!!

கற்றுக் கொண்ட அனுபவப் பாடத்தால் இந்த முறை வெந்தய நாற்றுக்களை இடம் மாற்றும் எண்ணம் வரவில்லை. இரண்டு மூன்று இலைகள் மட்டுமே வந்திருந்த இந்த நிலையிலேயே வெந்தயக் கீரையைப் பறிக்கலாம் என்றாலும், இப்போது பறித்தால் கசப்பு நன்றாகவே தெரியும் என இணையத்தின் உதவியில் தெரிய வந்தது. சரியென மேலும் 2-3 நாட்கள் விட்டேன். 

அதற்கு மேலும் பொறுமை இல்லாது, கசந்தாலும் பரவாயில்லை என 3 பாகம் கொண்ட தொட்டியில், ஒரு பாகத்துக் கீரையை மட்டும் பறித்துவிட்டேன். :))  தொட்டியில் மண் ஈரமாக இருக்கையில் கீரையை சுலபமாகப் பறித்துவிடலாம். பறித்து, வேர்ப்பகுதியை நறுக்கிவிட்டு மண் போக அலசி..

மேத்தி புலாவ் செய்துவிட்டேன்!! :)

கீரையின் கசப்பு லேசாகத் தெரிந்தாலும், புலாவ் நன்றாக இருந்தது. வெந்தயக் கீரையில் இரும்புச்சத்து அதிகம் என்று சொல்கிறார்கள்.
~~~

வெந்தயம் விதைத்த 17-ஆம் நாள் அறுவடை:)க்குப் பிறகு மீதமிருந்த கீரைகள் வளர்ந்துகொண்டே இருக்கின்றன.

இது கடந்த சனியன்று கீரையின் நிலை..

 சற்றே உயரமாக வளர்ந்திருந்த கீரைகளை மட்டும் அலுங்காமல் பறித்து..

வெந்தயக்கீரை பருப்புக் கூட்டு செய்தேன். 

படத்தின் பின்ணணியில் தெரிவன "சேனைக்கிழங்குவறுவல்" மற்றும் "சுரைக்காய் பொரியல்". :)

இன்னும் தொட்டியில் கீரை வளர்ந்துகொண்டிருக்கிறது. செடிகள் நெருக்கமாக இருந்த போதிலும் ஓரளவு உயரமாகவே வந்துவிட்டன. அடுத்த அறுவடைக்குப் பிறகு வெந்தயக்கீரையில் அடுத்த உணவுவகையுடன் சந்திப்போம். நன்றி!
:) 

மேத்தி புலாவ்/வெந்தயக்கீரை புலாவ்

தேவையான பொருட்கள்

சுத்தம் செய்த வெந்தயக் கீரை -1/2கப்

பாஸ்மதி அரிசி-1கப்

பச்சைப் பட்டாணி -1/4கப்

வெங்காயம்-1

தக்காளி-1

பச்சைமிளகாய் -2 (அ) 3 [காரத்திற்கேற்ப]

இஞ்சி- சிறுதுண்டு

பூண்டு-2பற்கள்

தேங்காய் துருவல்-1டேபிள்ஸ்பூன்

முந்திரி,திராட்சை- கொஞ்சம்

சர்க்கரை-1/2டீஸ்பூன்

எண்ணெய்-1டேபிள்ஸ்பூன்

நெய்-1டேபிள்ஸ்பூன்

சீரகம்-1/2டீஸ்பூன்

பொடித்துக்கொள்ள

பட்டை-சிறு துண்டு

கிராம்பு-2

ஏலக்காய்-1

செய்முறை

அரிசியை 2-3 முறை அலசி, 20 நிமிடங்கள் ஊறவைக்கவும்.

கீரையை மண் போக கழுவி தண்ணீர் வடித்து வைக்கவும்.

வெங்காயம், தக்காளியைப் பொடியாக நறுக்கவும். 

பச்சைமிளகாயை நீளமாக கீறி வைக்கவும். 

இஞ்சியைப் பொடியாக நறுக்கியும், பூண்டை ஒன்றிரண்டாகத் தட்டியும் வைக்கவும். 

பட்டை கிராம்பு ஏலக்காயைப் பொடித்துக் கொள்ளவும். 

குக்கரில் எண்ணெய்+நெய் காயவைத்து முந்திரி-திராட்சை சேர்த்து வதக்கவும். 

நறுக்கிய வெங்காயம், பச்சைமிளகாய், இஞ்சி, பூண்டு இவற்றை சேர்த்து வதக்கி, பட்டை-கிராம்பு-ஏலம் பொடியைச் சேர்த்து வதக்கவும்.

இதற்கிடையில் கீரையைப் பொடியாக நறுக்கிக் கொள்ளவும். 

வெங்காயம் வதங்கியதும் பட்டாணி மற்றும் வெந்தயக் கீரையைச் சேர்த்து சர்க்கரையையும் போட்டு வதக்கவும். 

கீரை வதங்கியதும் தக்காளி-தேங்காய்த் துருவல் சேர்த்து வதக்கவும். 

பிறகு ஊறிய பாஸ்மதி அரிசியைச் சேர்த்து, தேவையான உப்பும் சேர்த்து 11/2கப் தண்ணீர் விடவும்.

குக்கரை மூடி மிதமான தீயில் 7 நிமிடங்கள் சமைக்கவும். அதற்குள் விசில் வந்துவிடும், வராவிட்டாலும் பாதகமில்லை, ஏழு நிமிடங்கள் கழித்து குக்கரை அடுப்பில் இருந்து இறக்கிவிடவும். அரிசி ஊறி இருப்பதால் விரைவில் வெந்துவிடும். [இந்த முறை ஒரு கப் அரிசி அளவுக்கு...அரிசி அதிகம் சேர்த்தால் குக்கர் ஒரு விசில் வரும் வரை அடுப்பில் வைத்து பிறகு இறக்கவும்.]

குக்கரின் ப்ரெஷ்ஷர் முழுவதும் அடங்கிய பிறகு திறந்து சாதம் உடையாமல் கிளறிவிட்டு பரிமாறவும்.

இந்தப் புலாவ் அப்படியே சாப்பிடவும் அருமையாக இருக்கும். எனக்கு பச்சடி, சைட் டிஷ் எல்லாம் தேவையில்லாததால் செய்யவில்லை. உங்கள் விருப்பப்படி வெள்ளரி தயிர் பச்சடி, கேரட் தயிர் பச்சடி இவற்றுடன் சாப்பிடலாம்.

Recipe Courtesy : HERE

பின் குறிப்பு : வெந்தயக்கீரை  வீட்டில் வளர்ந்ததுதான், அது பற்றியும் இதேபதிவில் இணைக்கலாமென நினைத்தேன், (வழக்கம் போல) சுருங்கச் சொல்லி விளங்க வைக்கும் திறன் இல்லாததால் பதிவு நீண்டுவிடவே வெந்தயக்கீரை வளர்ப்பு பற்றி தனிப்பதிவு ஒன்று விரைவில் வெளியிடப்படும். :) 

வெந்தயக் கீரை பருப்பு கூட்டு

தேவையான பொருட்கள்
துவரம் பருப்பு -1/4கப்
சுத்தம் செய்த வெந்தயக் கீரை - 1 கைப்பிடி
சின்னவெங்காயம்-4
வரமிளகாய்-1
கடுகு-1/2டீஸ்பூன்
எண்ணெய்
உப்பு

அரைக்க
தேங்காய்த்துருவல் -2டேபிள்ஸ்பூன்
பச்சைமிளகாய்-3
சீரகம்-1டீஸ்பூன்
தக்காளி(சிறியதாக) -1 அல்லது அரைத்தக்காளி
மஞ்சள்தூள் -1/8டீஸ்பூன்

செய்முறை
கீரையை சுத்தம் செய்து, கழுவி பொடியாக நறுக்கிக்கொள்ளவும்.
வெங்காயத்தையும் பொடியாக நறுக்கிவைக்கவும்.
பருப்பை  தேவையான தண்ணீர் சேர்த்து குக்கரில் வேகவைத்து எடுத்து வைக்கவும்.
அரைக்க வேண்டிய பொருட்களை கொஞ்சமாகத் தண்ணீர் விட்டு அரைத்துஎடுத்துக்கொள்ளவும்.
பாத்திரத்தில் எண்ணெய் காயவைத்து கடுகு தாளித்து, வரமிளகாய் கிள்ளிப்போட்டு, வெங்காயமும் சேர்த்து வதக்கவும்.
வதங்கியதும் கீரையைச் சேர்த்து ஓரிரு நிமிடங்கள் வதக்கவும்.
அரைத்த விழுதுடன் அரைகப் தண்ணீரும் சேர்த்து கீரை கலவையுடன் சேர்த்து கொதிக்கவிடவும்.
நன்கு கொதித்து பச்சை  வாசம் போனதும், வெந்த பருப்பை மசித்து கூட்டுடன் சேர்க்கவும்.
பருப்பு சேர்ந்து ஒரு கொதி வந்ததும் அடுப்பிலிருந்து இறக்கவும்.
கமகம மணத்துடன் வெந்தயக் கீரை பருப்பு கூட்டு ரெடி.

சுடுசாதம்-கூட்டு- ரசம்- ஸ்பைஸி காலிப்ளவர்-உருளை-பட்டாணி வதக்கலுடன் சிம்பிளாக ஒரு நேர உணவு வேலை முடிந்துவிடும். :)

முருங்கைகீரை பருப்பு

முன்பே ஒருமுறை பச்சைப்பயறு-கீரை கடைசல் என்று ஒரு ரெசிப்பி போஸ்ட் செய்திருக்கிறேன். இதுவும் அதே செய்முறைதான், பச்சைப்பயறுக்குப் பதில் துவரம்பருப்பு, பாலக்கீரைக்குப் பதில் முருங்கைக் கீரை. ஆகமொத்தம் பருப்பில கீரை போட்டு மொளகா வேவிச்சுக் கொட்டி கடைஞ்சிருக்கேன், சாப்புட வாங்க! :)

தேவையான பொருட்கள்
துவரம்பருப்பு -1/4கப்
ஆய்ந்த முருங்கைக் கீரை இலைகள் - 2 கைப்பிடி
சின்னவெங்காயம் -10
தக்காளி-2
வரமிளகாய் -5 (காரத்துக்கேற்ப)
கொத்தமல்லி விதை (தனியா)-1டீஸ்பூன்
சீரகம் -1டீஸ்பூன்
மஞ்சள்தூள் -1/8டீஸ்பூன்
எண்ணெய்
உப்பு

செய்முறை
பருப்புடன் துளி எண்ணெய், மஞ்சள்தூள் சேர்த்து குழைய வேகவைத்து எடுக்கவும்.
சின்னவெங்காயம், தக்காளியை நறுக்கிவைக்கவும்.
பாத்திரத்தில் எண்ணெய் காயவைத்து கொத்தமல்லி, சீரகம் தாளித்து சின்ன வெங்காயம், கிள்ளிய வரமிளகாய் சேர்த்து வதக்கவும்.
வெங்காயம் வதங்கியதும் தக்காளி சேர்த்து வதக்கவும்.
தக்காளி மசிந்ததும் கொஞ்சம் மஞ்சள்தூள், கீரை சேர்த்து அரைகப் தண்ணீர் விட்டு சிலநிமிடங்கள் கொதிக்கவிடவும்.
கீரை வெந்து நீர் சுண்டியதும் வெந்த பருப்பைச் சேர்த்து, உப்பு- கால்கப் தண்ணீரும் சேர்த்து ஒரு கொதிவிட்டு அடுப்பிலிருந்து இறக்கவும்.
கீரை-பருப்பு கலவை கொஞ்சம் ஆறியதும் மத்தை வைத்து கடைந்துவிடவும், அல்லது கரண்டியால் நன்றாக மசித்துவிடவும்.
சுவையான முருங்கைகீரை-பருப்பு தயார். சூடான சாதம் + நெய் உடன் சாப்பிட நன்றாக இருக்கும்.

ஸ்பினாச் கோஃப்தா குழம்பு / பாலக்கீரை உருண்டை குழம்பு

தேவையான பொருட்கள்
கோஃப்தாவிற்கு
ஸ்பினாச் / பாலக்கீரை [கழுவி, நறுக்கியது] - 1 கப்
கடலை மாவு ~~~1/2 கப்
மிளகாய்த்தூள் -1 டீஸ்பூன்
மல்லி-சீரகத்தூள் -1 டீச்பூன்
சீரகம்- 1டீஸ்பூன்
**எள்ளு-வேர்க்கடலைப் பொடி -1 டேபிள்ஸ்பூன் (விரும்பினால்)
உப்பு
தண்ணீர்- சிறிது

குழம்பிற்கு
வெங்காயம் -1
தக்காளி -2
மிளகாய்த்தூள்- 1 1/2டீஸ்பூன்
மல்லித்தூள் -11/2டீஸ்பூன்
உப்பு
எண்ணெய்
பிரியாணி இலை -1
கிராம்பு-1
பட்டை - சிறுதுண்டு

செய்முறை
கோஃப்தாவிற்கு தேவையான பொருட்களை ஒரு கிண்ணத்தில் எடுத்து, கொஞ்சம் கொஞ்சமாக தண்ணீர் தெளித்து பிசைந்துகொள்ளவும். கடலை மாவும் கால் கப்பிற்கு பிறகு கொஞ்சம் கொஞ்சமாக சேர்க்கவும்.
பணியாரக் கல்லை காயவைத்து, கொஞ்சமாக எண்ணெய் விட்டு, கீரை-கடலைமாவு கலவையை சிறு கோஃப்தாக்களாக உருட்டி போடவும்.
ஒரு புறம் வெந்ததும், திருப்பிவிட்டு பொன்னிறமாக வெந்ததும் எடுத்து வைக்கவும்.
வெங்காயம், தக்காளியை தனித்தனியே அரைத்து வைக்கவும்.
கடாயில் எண்ணெய் காயவிட்டு, பிரியாணி இலை - பட்டை - கிராம்பு தாளித்து அரைத்த வெங்காயம் சேர்த்து பச்சைவாசம் போகும்வ்ரை வதக்கவும்.
பிறகு அரைத்த தக்காளி சேர்த்து வதக்கவும்.
தக்காளி நன்கு வதங்கியதும் மிளகாய்த்தூள் - மல்லித்தூள் - மஞ்சள்தூள் - உப்பு சேர்த்து ஒண்ணரை கப் தண்ணீர் விட்டு கொதிக்கவிடவும்.

கலவை பச்சைவாசம் அடங்க நன்கு கொதித்து சுண்டியதும், அரை டீஸ்பூன் சர்க்கரை சேர்த்து கலந்துவிட்டு, கோஃப்தாக்களை சேர்க்கவும்.
குறைந்த தீயில் சில நிமிடம் கொதிக்கவிட்டு கொத்துமல்லி இலை தூவி அடுப்பிலிருந்து இறக்கவும்.
சுவையாக ஸ்பினாச் கோஃப்தா குழம்பு தயார். சப்பாத்தி, நாண், ஜீரா ரைஸ் போன்ற நார்த் இண்டியன் உணவுவகைகளுக்கு இந்த கோஃப்தா கறி சூப்பராக இருக்கும்.

குறிப்பு
கடலை மாவு சேர்ப்பது கீரை நன்கு சேர்ந்து உருண்டைகளாக உருட்டும் பதம் வருவதற்காக. எனவே அரைக்கப் மாவையும் மொத்தமாக சேர்க்காமல், கொஞ்சம் கொஞ்சமாக சேர்க்கவும். உருட்டும் பக்குவம் வந்ததும் நிறுத்திவிடவும்.
க்ரேவி நிறைய வேண்டும் என்றால் உங்க விருப்பபடி தண்ணீர் அளவை அதிகரிக்கலாம்.
கோஃப்தாவிலும் உப்பு இருக்கும், குழம்பிலும் உப்பு சேர்க்கிறோம், அதனால் கவனமாக சேர்க்கவும்.
**எள்ளு-வேர்க்கடலைப் பொடி- ஒரு டேபிள்ஸ்பூன் வறுத்த வேர்க்கடலை, அரை டீஸ்பூன் எள்ளை பொடித்த பொடி.
வாக்கிங் போக கிளம்பிட்டு இருந்ததால் அவசரத்தில் எடுத்த படம், கொஞ்சம் ஷ்ஷ்ஷ்ஷ்ஷேக் ஆகிருச்சு, அட்ஜஸ்ட் பண்ணிக்குங்க! :))) போட்டோவை தெளிவாப் பாக்கோணும்னா நான் ஒரு remedy சொல்றேன், தலைய (உங்க தலையத்தான்...) இடம் வலமா மணிக்கு 5 கி.மீ. வேகத்தில ஆட்டுங்க, அப்ப தெளிவாத் தெரியும்! ஹிஹி..ஹி..என்னது, தெரியலையா? அப்ப வலமிருந்து இடம், அல்லது மேலிருந்து கீழ், கீழிருந்து மேல்..இப்படி எதாச்சும் ஒரு காம்பினேஷன் ட்ரை பண்ணுங்க, கண்டிப்பா தெளிவாகிருவீங்க! :)))

ப்ரஸ்ஸல் ஸ்ப்ரவுட்ஸ் பொரியல் / Burssel Sprouts Stir fry

ப்ரஸ்ஸல் ஸ்பரவுட்ஸ் வாங்கவேண்டும் என்ற நினைவு வருகையில் கடையில் இருக்கும் ப்ரஸ்ஸல் ஸ்ப்ரவுட்ஸ் எல்லாம் வாடிவதங்கிப் போயிருக்கும். அது ப்ரெஷ்ஷாகவே இருக்கும் போது எனக்கு நினைவில்லாமல் வந்துவிடுவேன். ஒருவழியாக ப்ரெஷ் பேக் ப்ரஸ்ஸல் ஸ்ப்ரவுட் வாங்கிவந்தாயிற்று. முதல் முறை என்ன சமைப்பது என்று குழப்பமாக இருந்தது. என்னவரின் ஆஃபீஸ் cafeteria- வில் இந்தக் காயை முழுதாக bake செய்து தருவார்களாம், நீயும் அப்படி ட்ரை செய்து பாரேன் என்று ஐடியா கொடுத்தார். நம்ம ருசிக்கேற்ப மசாலா பொடி சேர்த்து மாரினேட் பண்ணினேன், பசிக்க ஆரம்பித்ததால் oven-ல் bake செய்யாமல் இதோ அந்த ரெசிப்பி..

தேவையான பொருட்கள்
ப்ரஸ்ஸல் ஸ்ப்ரவுட்ஸ்-12
ஆலிவ் ஆயில்-2 டேபிள்ஸ்பூன்
சில்லி சிக்கன் மசாலா-1டேபிள்ஸ்பூன்
உப்பு
செய்முறை
ப்ரஸ்ஸல் ஸ்ப்ரவுட்ஸை கழுவி, தண்ணீரை சுத்தமாக வடித்துவிட்டு நான்காகப் பிளந்துகொள்ளவும்.
ஒரு கிண்ணத்தில் ப்ரஸ்ஸல் ஸ்பரவுட்ஸ், மசாலா பொடி, உப்பு மற்றும் ஒரு டேபிள்ஸ்பூன் ஆலிவ் ஆயில் சேர்த்து நன்றாக குலுக்கிவிட்டு அரைமணி நேரம் வைக்கவும்.
கடாயில் ஒரு டேபிள்ஸ்பூன் எண்ணெய் காயவைத்து மசாலா கலந்த ப்ரஸ்ஸல் ஸ்ப்ரவுட்ஸை சேர்த்து வதக்கவும்.
தீயைக் கூட்டி வைத்து மூடி போட்டு 3-4 நிமிடங்கள் வேகவிடவும். மூடியைத் திறந்து காயை அடிபிடிக்காமல் கிளறிவிட்டு, அடுப்பிலிருந்து இறக்கவும். சுவையான ப்ரஸ்ஸல் ஸ்ப்ரவுட்ஸ் ஸ்டிர் ஃப்ரை ரெடி. சாதம்- உப்பு பருப்பு-ரசம் இவற்றுடன் பரிமாற சூப்பராக இருக்கும்.

பி.கு. இந்த முறையில் காய் முழுவதுமாக வெந்திருக்காது, க்ரன்ச்சியாக இருக்கும்.
~~
இரண்டாவது முறையில் நான் செய்த பொரியல் அடுத்ததாக! :)
~~
தேவையான பொருட்கள்
ப்ரஸ்ஸல் ஸ்ப்ரவுட்ஸ்
வெங்காயம்-1
காய்ந்த மிளகாய்-3
கடுகு-1/2டீஸ்பூன்
க.பருப்பு, உ.பருப்பு - தலா 1 டீஸ்பூன்
சீரகம்-1டீஸ்பூன்
வேகவைத்த பாசிப்பருப்பு-1 குழிக்கரண்டி
தேங்காய்த் துருவல்-2 டீஸ்பூன்
உப்பு
எண்ணெய்
செய்முறை
ப்ரஸ்ஸல் ஸ்பரவுட்ஸை பொடியாக நறுக்கவும்.
வெங்காயத்தையும் நறுக்கவும்.
கடாயில் எண்ணெய் காயவிட்டு கடுகு போட்டு பொரியவிடவும். க.பருப்பு-உ.பருப்பு சேர்த்து பொன்னிறமாக வறுபட்டதும் சீரகம் சேர்க்கவும். சீரகம் வெடித்ததும் வெங்காயம், கிள்ளிய மிளகாய் சேர்த்து வதக்கவும்.
வெங்காயம் வதங்கியதும் காயைச் சேர்த்து கொஞ்சமாகத் தண்ணீர் தெளித்து வேகவிடவும்.
காய் வெந்ததும் உப்பு, வேகவைத்த பருப்பு சேர்த்து கலந்துவிடவும்.
ஓரிரு நிமிடங்கள் கழித்து தேங்காய்த் துருவல் சேர்த்து அடுப்பிலிருந்து இறக்கவும்.
சாதம்-வத்தக்குழம்பு-ரசம் இவற்றுடன் பரிமாற சுவையான சுவையான (தென்னிந்திய ஸ்டைல்) ப்ரஸ்ஸல் ஸ்ப்ரவுட்ஸ் பொரியல் ரெடி!

இரண்டு பொரியலுமே சுவையாய் இருந்தது..இந்த காய் உடலுக்கு மிகவும் நல்லது என்கிறார்கள். நீங்களும் செய்து சுவைத்துப் பாருங்க!
~~
மணத்தக்காளிக் கீரையை எங்க ஊர்ப்பக்கம் "சுக்குட்டிக் கீரை" என்றுதான் சொல்வது வழக்கம். :) ஆசைக்கு செடிகளை வளர்த்தாலும் ஒன்றிரண்டு செடிகள் வரைதான் எங்க வீட்டில் வளர்ந்திருக்கு. இதிலே சிவப்பு நிறப் பழம் பழுக்கும் வகையும் உண்டு.

இந்தச் செடியை வீட்டில் வளர்த்தாலும் பழம் பறித்துச் சாப்பிடலாமே தவிர கீரையாய்ப் பறித்து ஒரு குடும்பத்துக்குச் சமைப்பதுக்கு கீரைத் தோட்டம்தான் போடவேண்டும்! ;0) அதனாலோ என்னமோ கீரைக்காரர்களிடம் இந்தக்கீரைக்கு ஸ்பெஷல் விலையாக இருக்கும். மற்ற கீரையெல்லாம் 1.50ரூபாய்க்கு விற்கையில் இந்தக் கீரை 3 ரூபாயாக இருக்கும்.

கடந்த முறை ஊருக்குப் போயிருந்தபோது கீரைக்காரரிடம் சுக்குட்டிக் கீரையைப் பார்த்ததும் வாங்கலாம் என்று விலையைக் கேட்டால் 8 ரூபாய்கள்!! கீரையும் அவ்வளவு ஃப்ரெஷ்ஷாக இருந்தது என்று சொல்ல முடியவில்லை! இருந்தாலும் இனி எத்தனை நாள் கழிச்சு சுக்குட்டிக் கீரையைப் பார்க்கும் வாய்ப்புக் கிடைக்குமோ என்று வாங்கி பொரியல் செய்தேன். பொதுவாக, பொரியல் என்பதுக்கு எங்க வீட்டில ரொம்ப சிம்பிள் ப்ராஸஸுங்க!

கீரையோ, காய்கறியோ எது மெயின் இன்கிரிடியன்ட்டோ, அதை நறுக்கி வைச்சுக்கணும். வெங்காயம்- பச்சை நிறக் காய்கள், கீரைக்கு மட்டும் வரமிளகாய், மத்த காய்களுக்கு பச்சைமிளகாய் இதையும் நறுக்கி ரெடியா வைச்சுக்கணும்.
கடாயில் எண்ணெய் காயவிட்டு கடுகு-க.பருப்பு,உ.பருப்பு தாளித்து நறுக்கிய காய் சேர்த்து கொஞ்சம் தண்ணிதெளிச்சு உப்பு போட்டு வேகவிட்டு வெந்ததும் தேங்கா போட்டு இறக்கவேண்டியதுதேன்! சுக்குட்டிக் கீரைப் பொரியலும் இதுக்கு விதிவிலக்கில்லை! :)))))

----
என் நிலைமை இப்படியிருக்க, சுக்குட்டிக் கீரைத் தோட்டத்தையே "பர்ட் ஃபீடராக" உபயோகிக்கும், திருக்குறளில் வார்த்தைகளுக்குப் பதிலாக காயையும் கனியையும் படமெடுத்துப் போடுமளவுக்கு விளைச்சல் பார்க்கும் இமா குடுத்துவைச்சவங்கதானே? ;);)
எங்கோ ஒளிந்து கிடந்த கீரைப் படங்களைத் தேடி எடுத்து கொஞ்சம் மொக்கையும் போடவைத்த இமா வாழ்க! :)))))))
---
[முதல் படம்: நன்றி,கூகுள் இமேஜஸ்]

கீரைப் பொரியல்

கீரைப் பொரியலுக்கு ஒரு போஸ்டிங்கான்னு பார்க்காதீங்க..:) ஒரு முன்கதையோட சொல்லப்போறேன்.

இந்த வாரம் கடைக்கு போயிருந்தப்போ இந்தக் கீரையைப் பார்த்தேன்.முருங்கை கீரை மாதிரியே இருந்தது.ஊர்ல இருந்து வந்த இந்த ரெண்டரை வருஷமா முருங்கைக் கீரைய கண்ணால கூட பார்க்கலை! கொஞ்சநாள் முந்தி பார்த்தப்ப எல்லாம் (அதாவதுங்க, நாங்க ரெண்டு வருஷம் முன்பு சில காலம் இருந்த இடத்துக்கே இப்ப மீண்டும் வந்திருக்கோம். :) ) இதை வாங்கலாமா,வேணாமான்னு டைலமா-லயே வாங்காம வந்திடுவேன்..இந்த முறை சுரிதார் போட்ட ஒரு அக்கா ( நாங்க இருந்தது இண்டியன் ஸ்டோர் இல்லை) இதை எடுத்துட்டு போனாங்க.அப்பவே வாங்கிடலாம்னு ஒரு தைரியம் வந்துடுச்சு.

"அங்கேயே நின்னு என்ன ஆராய்ச்சி பண்ணறே?"-ன்னு கேட்டுட்டே வந்த இவரிடம் கீரையைக் காட்டினேன்.இவருக்கும் தெரில...முருங்கை கீரை நல்லா வாசனையா இருக்குமேன்னு,இலைய எடுத்து முகர்ந்து பார்த்தால் ஒரு வாசமும் இல்லை. நாங்க இந்த ஆராய்ச்சி பண்ணும்போது, கூட வந்த நண்பர்கள் பில் போட்டுட்டு எங்களுக்காக வெயிட்டிங்! சரி, எப்படின்னாலும் சாப்பிடறமாதிரி:) இலையாத்தானே இருக்கும்னு தைரியமா வாங்கிட்டு வந்தாச்சு.

முருங்கைக் கீரை மாதிரியே இலைகளை மட்டும் எடுத்து செய்தேன்...சுவை அருமையா இருந்தது..அகத்திக் கீரை & முருங்கை கீரை ரெண்டோட டேஸ்ட்டும்தெரிஞ்சது. டேஸ்ட் சூப்பரா இருந்ததால சப்பாத்திக்கே வைச்சு சாப்ட்டுட்டோம்.

முருங்கை வாசம் இல்லாததால் இது 'முருங்கை'கீரை பொரியல் இல்ல..'ஏதோ ஒரு'கீரை பொரியல்-னுதான் பேர் வைச்சிருக்கேன். :)

தேவையான பொருட்கள்
கீரை -1 கட்டு
வெங்காயம் - பாதி
காய்ந்த மிளகாய் -4அல்லது காரத்துக்கேற்ப
தேங்காய்த் துருவல்-1 1/2ஸ்பூன்
கடுகு-1/2ஸ்பூன்
கடலைப்பருப்பு,உளுந்துப் பருப்பு-தலா 1/2ஸ்பூன்
உப்பு-சுவைக்கேற்ப
சர்க்கரை - ஒரு சிட்டிகை

செய்முறை
கீரையை கழுவி சுத்தம் செய்து வைக்கவும்.


வெங்காயத்தை நறுக்கிகொள்ளவும்.மிளகாயை ஒன்றிரண்டாக உடைத்துக் கொள்ளவும்.
கடாயில் எண்ணெய் காய வைத்து கடுகு,க.பருப்பு,உ.பருப்பு தாளித்து, வெங்காயம்,மிளகாய் வற்றல் சேர்த்து வதக்கவும்.வெங்காயம் வதங்கியதும் கீரையைச் சேர்க்கவும்.


ஒரு சிட்டிகை சர்க்கரை சேர்த்து கிளறிவிட்டு, தண்ணீர் தெளித்து வேக விடவும்.
கீரை வெந்ததும் தேவையான உப்பு சேர்த்து கலக்கி தேங்காய்த் துருவல் சேர்த்து இறக்கவும்.


இது சப்பாத்திக்கும் நன்றாக மேட்ச் ஆகும்..சாதத்துடனும் சாப்பிடலாம்.

குறிப்பு
சர்க்கரை சேர்ப்பதால் கீரையின் பசுமை மாறாம இருக்கும்னு ஒரு புத்தகத்தில படித்திருக்கேன்.கீரை வகைகள்னு இல்லை, பச்சை நிறத்தில இருக்கற காய்கறிகள் எல்லாத்துக்கும் ஒரு சிட்டிகை சர்க்கரை சேர்த்து சமைத்தால் நிறம் மாறாமல் இருக்குமாம்.

நான் வாங்கிய கீரையில் Malunggay -என்று எழுதிருந்தாங்க..அதுவும் இமா சொன்னமாதிரி முருங்கை குடும்பம்தான்..பிலிப்பைன்ஸ்ல இந்தப் பெயர்.(நான் வாங்கியது சைனீஸ் மார்க்கட்ல..:)) இமா,உங்கள் தகவலுக்கு நன்றி!